രണ്ടു ദിവസത്തിനകം താൻ അറസ്​റ്റ്​ ചെയ്യപ്പെ​ട്ടേക്കാമെന്ന്​ ​ചന്ദ്രബാബു നായിഡു

അമരാവതി: താൻ രണ്ടു ദിവസത്തിനകം അറസ്​റ്റ്​ ചെയ്യപ്പെ​ട്ടേക്കാമെന്ന്​ ആന്ധ്ര മുഖ്യമന്ത്രി ചന്ദ്രബാബു നായിഡു . പ്രധാനമന്ത്രി നരേന്ദ്ര മോദി തന്നെ ഉപദ്രവിക്കുകയാണെന്നും നായിഡു പറഞ്ഞു.

നാളെയോ മറ്റന്നാളോ അവർ എ​െന്ന അറസ്​റ്റ്​ ചെയ്​തക്കോം. അതിന്​ അവരെ അനുവദിക്കുക. ഞാൻ ​ജയിലിൽ പോകാം. എന്നാൽ കീഴടങ്ങാൻ തയാറല്ല. - വിശാഖപ്പെട്ടണത്തെ തെരഞ്ഞെടുപ്പ്​ റാലിയിൽ സംസാരിക്കുകയായിരുന്നു ചന്ദ്രബാബു നായിഡു.

രാജ്യ സഭാ എം.പിയും നായിഡുവിൻെറ അടുത്ത സഹായിയുമായ സി. എം രമേശിൻെറ കദപയിലെ വസതിയിൽ ആദായ നികുതി ഉദ്യോഗസ്​ഥരുടെ റെയ്​ഡ്​ നടന്നിരുന്നു. അതിന്​ പിന്നാലെ ടി.ഡി.പി നേതാക്കളെയും സ്​ഥാനാർഥികളെയും ഉപദ്രവിക്കുന്നതിനായി മോദി കേ​ന്ദ്ര ഏജൻസികളെ ദുരുപയോഗം ചെയ്യുകയാണെന്ന്​ നായിഡു വിമർശിച്ചിരുന്നു.

ആദായ നികുതി വകുപ്പ്​, എൻഫോഴ്​സ്​മ​​െൻറ്​ ഡയറക്​ടറേറ്റ്​, സി.ബി.ഐ, ആർ.ബി.ഐ എന്നീ ഏജൻസികളെ ഉപയോഗിച്ച്​ ജനാധിപത്യത്തെ മോദി അപമാനിക്കുകയ​ാണെന്നും നായിഡു പറഞ്ഞു. ചീഫ്​ സെക്രട്ടറി അനിൽ ചന്ദ്ര പുനേതയെ മാറ്റിയ തെരഞ്ഞെടുപ്പ്​ കമീഷൻ നടപടിയെയും ചന്ദ്ര ബാബു നായിഡു വിമർശിച്ചു. കമീഷൻ മോദിയുടെ ആജ്​​ഞ നടപ്പിലാക്കുകയാണ്​.

തെരഞ്ഞെടുപ്പ്​ കമീഷൻ ഒരു കലക്​ടറെ സ്​ഥലം മാറ്റി. ഡയറക്​ടർ ജനറൽ ഉൾപ്പെടെ മൂന്ന്​ ഐ.പി.എസ്​ ഉദ്യോഗസ്​ഥരെ മാറ്റി. ഇന്ന്​ ഒരു കാരണവും പറയാതെ ചീഫ്​ സെക്രട്ടറിയെയും നീക്കിയിരിക്കുന്നു. തെരഞ്ഞെടുപ്പ്​ കമീഷന്​ തോന്നുന്നതു പോലെ പ്രവർത്തിക്കാൻ സാധിക്കില്ല. നിഷ്​പക്ഷമായാണ്​ പ്രവർത്തിക്കേണ്ടത്​. കമീഷൻെറ നടപടി വൈ.എസ്​.ആർ കോൺഗ്രസിനെ സഹായിക്കുന്നതിനാണ്​. മോദിയും തെലങ്കാന മുഖ്യമന്ത്രി കെ. ചന്ദ്രശേഖര റാവുവും വൈ.എസ്​.ആർ കോൺഗ്രസ്​ നേതാവ്​ ജഗ്​ മോഹൻ റെഡ്​ഢിയും ഡി.ടി.പിക്കെതിരെ ഗൂഢാലോചന നടത്തുകയാണെന്നും നായിഡു ആരോപിച്ചു.